鮮士多啤梨湯丸

材料：
粘米粉2兩、糯米粉6兩、鮮士多啤梨1盒、細雜果1罐、冰糖或砂糖適量、凍水及滾水適量

做法：

1. 粘米粉和糯米粉倒入大碗內，加入少許滾水搋，再逐少倒入凍水搋成粉糰。
2. 將粉糰分數小份，取一份粉糰，用手捏平，包一粒已洗乾淨的士多啤梨做餡，用手輕輕包實。
3. 煲滾適量水，加入適量冰糖，再加入雜果煮滾；最後將湯丸加入滾一會(見湯丸浮面)即可上碗食用。

備註：

• 加暖水皮夠煙韌──搋粉時加入暖水有助粉糰唔易乾裂，食起來會煙韌些。
• 控制水份──搋粉應逐少加入凍水，以控制粉糰唔會出現太乾或太濕情況。
• 皮軟硬適中──湯丸皮要軟硬適中，就要以糯米粉溝粘米粉，單用糯米粉皮會較糊口(黏)，相反只用粘米粉又會過硬。
• 水果任配搭──可隨個人口味，用其他水果做陷，如水蜜桃、奇異果等。
• 勿滾太耐──由於用了水果做湯丸餡，所以當湯丸滾至浮面即要上碟，否則士多啤梨會過熟而失去原有味道。